Resolucion nº2

D'unes, aquí e aquí, me sugerisson que l'anglés es benlèu mai simple que lo portugués.

Bevi de còca-còla, agachi los Simpsons, mandi d'"emails" e tot me sembla "ok", e mai pièger: l'anglés e ieu, aquò èra una istòria d'amor!

Al collègi, èri la primièra de la classa  (en anglés, pas en espòrt). En quatrena e tresena, escotavi de gropes sornes que cantavan pas qu'en anglés. Nick Cave faguèt qu'aviái bravament de vocabulari en anglés.

Al licèu, en segonda e primièra, aguèri una pròf hippie-pacholí que somiavi pas que d'una causa es que m'adoptèsse. Parlaviam musica, escambiaviam caissetas e CD e quand anava en Anglatèrra, me portava de revistas musicalas d'alai que me fasián pantaissar. 

Pièger que tot: aviái de dòcs Martens amb l'Union Jack dessús. Si, si, vos prometi. Quand o vos disi que lo ridicul tuga pas :D

Tanavi mos parents per que me paguèsson un viatge en Anglatèrra, un "sejorn-linguisticqueseriá-bravament-util-per-mos-estudis-e-ma-carrièra-professionala". Mas non, volguèron pas.

Puèi en Terminala, aguèri una professora que la paura, èra brava, mas pas brica interessanta e amb 4 sègles de retard, e segur a costat de ma pròf hippie-pacholí qu'aimavi mai que tot, ben, la paura d'ela podiá pas far lo pes.

Comencèri al meteis temps l'occitan, e aquò m'interessèt plan mai que non pas los corses d'anglés. 

Puèi rescontrèri un espanhòl.

Alara l'anglés...

Puèi, anèri en ipocanha. Aviái la causida entre (anglés + espanhòl ) o (una lenga + geografia). Al primièr cors d'anglés, foguèt la panica, lo pròf interrogava lo mond a l'asard Bautezar e ieu pregavi totes los Dieus de totas las religions perque m'interroguèsse pas. Sortiguèri del cors en me dire "Pus jamai de ma vida farai d'anglés.". Alara faguèri espanhòl e geografia. Pas gaire de temps. Que finala, soi puslèu una ipercanhosa ieu. Alara en novembre anèri a la fac far d'occitan, causida que tot lo mond me criticava a l'epòca e que regreti pas brica.

E pas jamai pus faguèri d'anglés.

Ne'n fau pas una glòria. Pas brica. Al bèl contrari.

Ara, per me motivar e tornar recuperar un nivèl un pauc decent, me soi abonada a Vocable, la revista pels nuls en anglés. E ben i arribi pas. Pas que compreni pas, mas me confla, me tomba de las mans, ai pas enveja. M'i esfòrci, mas non.

La solucion, es pas complicada: l'immersion completa a còps de puddin sul cap. Mas i soi pas encara anada dins un país anglofòn. I pensi, i pensi, mas o fau pas jamai.

First of all: anar far un passapòrt.