Lo corrector

L'autre jorn, romeguèri.

Perque soi una romegaira.

Mas pas solament. 

Alara dins un email ont ensagèri d'èsser aimabla,  ai demandat oficialament al corrector psicopata de me senhalar las fautas del blòg. Perque me pòt pas far de mal de me melhorar.

E vos pòdi dire que dempuèi que li mandèri l'email (a pas dich de òc lo tipe, mas a pas dich de non tanpauc, n'ai dedusit qu'èra d'acòrdi), me la peti grèu! Imaginatz: ai un corrector. I a un tipe que me legís, plan concentrat, e que nota sus un bocin de papièr los mots que cal cambiar, melhorar, patin cofin e que me manda un email intelligent, intelligent aquò vòl dire: "que va pas macar mon ego subredimensionat" e que me fa rire, en mai de m'emmerdar, segur.

Pas que per ieu.

Me la peti grèu grèu grèu. 

Soi tras que contenta

Ai un corrector a ieu. E pas un tipex que rabala sul burèu, non, non, un tipe vertadièr.

E, al monde.fr, n'an pas que dos de correctors, e ieu n'ai un per ieu soleta!!!

W  O  W!!

E ben, mon corrector, nos li cal trobar un escais pel blòg :) Imaginatz plan que marcariá mal de dire oficialament que Loís Alibèrt (a non, pas el, pudís) Frederic Mistral (a, non, èra de drecha), Pompeu Fabra (a non, es catalan) corregís mon blòg.

Alara, mas idèas:

- Drechador. Perque "Corrector" en panoccitan aquò se ditz "condrechador" e mon corrector n'es pas un de con. Mas bon, dins "drechador", i a un pauc tròp "drecha" dedins, e aquò li agradarà pas gaire a mon corrector (e a ieu tanpauc).

- O'be One. perque soi una padawanòta. E que Yoda es francament lèd.

-  Lo Mèstre, perque l'apèli coma aquò dins los emails, just aprèp "m'emmèrdas".

- L'anèu, perque es mon corrector a ieu e que me provòca un sindròme Gollum un pauc inquietant.
- Pai Mei, lo grand mèstre chinés dins Kill Bill 2.

Qué ne disètz vosautres? Podètz votar sul sondatge a drecha(dor). Las idèas son las planvengudas. Encuolatòr o sodomizador_de_babaus, los podètz prepausar, mas seràn pas aceptats, pas de pornografia zoofila sus aquel blòg, que aprèp, la CatedralaInterRegionalaPatinOccitanCofin me va censurar.

 Mon paure Corrector, mais que diable es-tu allé faire dans cette galère?


EDIT DEL 16/01:
Las resultas del sondatge:
Drechador: 1
O'be One: 5
Lo Mèstre: 6
L'anèu: 0
Pai Mei: 1
LoCorrector: 2