Lo rugbí amb la Pomponeta

Dissabte de ser, la Pomponeta me venguèt quèrre a l'ostal amb sa veitura de Playmobil. Dirreccion: l'estadi tot nòu Yves du Manoir per veire jogar Montpelhièr contra de desconeguts. Faguèri de co-pilòta e vos cal saber que coma co-pilòta, soi lo tòp del tòp.  Nos calguèt daissar l'autò al tron de Dieu perque lo parking, per i anar, te cal aver una plaça-parking e nosautres aviam pas de plaças-parking aviam doas plaças ganhadas que nos las caliá retirar sabiam pas ont. Rai. Doncas seguiguèrem la tropelada qu'aviá daissada l'autò al parking Tron de Dieu. E aquí foguèri estonada: i aviá de tot: de joves, de vièlhs, d'enfants, de familhas entièras, la causa simpatica qué. Oè, benlèu qu'aquò vos estona pas, ben ieu, m'estonèt, que sortissi pas jamai de ma cauma naut-debit.

Arribèrem qu'èran a s'entrainar s'escaufar. Es bèl aquel estadi!!!

Pomponeta, lo rugbí, aquò li agrada. Lo dimenge, tre 5h, pòs pas mai parlar a son ostal perque i a Estadi 2 que comença. E entre tu e Nelson Monfort, Pomponeta causís Nelson Montfort.
Alara, me coachava e quand comencèt lo rescontre diguèt:  

- Te cal seguir lo balon.

- Mas ont es la pauma?????

- E ben au mitan del terren colha, es la debuta!

E ben ieu disi qu'es mai aisit de seguir lo balon a la tele, perque la camera sap totjorn ont es lo balon. En mai d'aquò, al rugbí, la veishiga, te la prenon, te la foton sul braç e se'n van en córrer e tu sabes pas mai ont es lo balon.

S'as pas jamai vist un rescontre de rugbí, te vau explicar çò qu'ai comprès. La tòca: anar t'espotir pel sòl contra lo balon darrièr la linha dels pals dels autres. Per aquò far, prenes lo balon sota lo braç, corres fins a la linha e pausas lo balon pel sòl, danças la lambada perque venes de marcar un ensag, as 5 punts. Aquò's la teoria. Perque en practica, i a los adversaris que t'empachan de córrer, se meton dabans tu, t'agantan las patas per te far tombar, te sautan dessús, e paf lo jogaire. Doncas, per contunhar d'avançar e pas prene tròp de còps perque siás sensible del còs, passas la pauma a tos coequipièrs qu'an la meteissa tòca que tu, mas mèfi, e es aquí la dificultat del rugbí: te cal far una passa a un coequipièr qu'es darrièr tu. La logica voldriá que coma cal avançar la passèsse dabans, mas non, es la logica del rugbí: recuolar per melhor avançar.

Aquò, ai comprès.

Aprèp ai pas comprès perqué e quora se fa una mesclanha.

Sus la fòto: los blancs son los Angleses, los Blaus los montpelhierencs. Lo tipe en irange, es una autra còla: la dels arbitres, un au mitan - lo que vesèm - que manca de prene de bofas, un parelh que sabi pas ont son, e lo quatren, lo mai finòt, qu'es al caud, al contraròtle de la video.

Foguèri decebuda pels suportaires. Innocenta, cresiái qu'aquò cantava, sautava, bramava. E ben non. Dau còp, lo tipe que parla dins lo micro te balança un jingle amb una trompeta que jòga tres nòtas qu'aprèp deves bramar "oléeee". Pietadós.

E ben, las poiriái anar far amb mon autbòi las tres nòtas que lo mond cridan "oléeee!". M'i caldrà pensar quand tornarai ganhar de plaças. Ara qu'ai compresa la tecnica per ganhar de plaças, tornarai jogar!!!

 Puèi, i a tot plen de pausas. I a tot plen de temps ont fan pas res, ont espèras, ont sas pas tròp de qué se passa. Es aquí que lo comentator de la tele te manca, al mens, mentre los jogaires fan pas res, lo comentator te parla e t'explica.

Lo rescontre dura 80 minutas, e contrariament al fotbòl i a pas de minutas en mai en causa dels "arrèsts de jòc", sequenon, e ben i seriam demoradas tota la nuèch a l'estadi!

E i voliái pas demorar tota la nuèch, que se gelèrem:

 Pomponeta qu'aviá freg als pès.

 Eriam coma doas mametas amb las cubèrtas suls genolhs.

Nos mancava pas que lo sèti plegable.

Aquò's ma boneta tota nòva 

qu'ai crompada per jogar d'autbòi per carrièra.

Soi plan contenta de las aver ganhadas las plaças que, me cal dire la vertat, m'auriá fach cagar de pagar 20€ per aquò. Montpelhièr foguèron pas gaire bons, los Angleses joguèron plan e perdèron los paures d'eles. Se Montpelhièr èran pas gaire bons, es perque èra mai que mai la "còla 2, i aviá pas lo polit Tro-Duc e quand abans de començar te dison la composicion de las doas còlas, manquèri de partir en veire que i èra pas lo mai polit de la còla. Vegèrem de plan plan luènh lo Fabien Galtièr que la Pomponeta n'es amorosa. 

Tot aquò per dire qu'un rescontre de rugbí, aquò te desrevelha la libido :)))

Reclama: Se cèrca mascle traput e pelut per anar al rugbí la dimenjada e comentar lo rescontre jol plumon. Fin de la reclama.

L'escacalàs de la serada, foguèt aquel òme que s'èra enganat d'estadi o d'eissarpa: a l'eissarpa del Montpelhièr Fotbòl Club.

Mercés a la Pomponeta de m'aver acompanhada!